Sempre pungenti e attenti ai problemi della città, Sandrone e la famiglia Pavironica sono tornati a dire la loro dal balcone del municipio, parlando a una piazza piena di modenesi che avevano voglia di sentire lo Sproloquio dal vivo. Il discorso delle maschere più amate dai modenesi ha toccato come sempre i temi più disparati, con una premessa importante, in un Carnevale reso meno allegro del solito a causa della guerra in Est Europa. Sandrone per la pace, Sandrone anche per il vaccino. Le maschere modenesi sono pronte anche a farsi la quarta dose pur di uscire dall’incubo del Covid e sono grate ai medici per quello che hanno fatto in questi due anni di pandemia. Ma venendo ai problemi propri della città, la famiglia Pavironica bacchetta l’amministrazione sul numero di monopattini elettrici, sulla viabilità e sulla sicurezza. Come poteva poi mancare la gioia di Sgorghiguelo, da sempre appassionato di sport, di fronte ai successi del Modena e dell’Italia nel 2021? E mentre la Pulonia guarda al dopo Muzzarelli sperando finalmente in un sindaco donna, la famiglia Pavironica chiude lo Sproloquio ricordando una verità che i modenesi conoscono bene.
LO SPROLOQUIO INTEGRALE:
Sand.: Mudnes ed Modna , Zemian nèe e chersùu sàtta la Ghirlandeina , la tàrr piò bela d’Italia e simbol ed la nostra zitèe , zitadein del centro storico e dei quartieri periferici, oriundi ed via Carteria e zone limitrofe, Mudnes vaccinèe con al Pfizer , con l’Astrazeneca, Moderna e con al Johnson e Johnson , no vax , no tass , no tav , no tótt , av salut tótt quant in massa.
Zemian cum’andamia ? Psamia dir d’éser fóra dal tunnel ? Ma! Chi al sa !? Me, però, a dégh ancàra ‘na volta grazie ai dutor , ai infermer e tótt quìi ch’igh girèn datorna perché , per merit sóo , a sam turnèe fóra a respirer l’aria sana che , anch s-l’an n’é brisa al massim e a duvam ancàra purter la mascareina , l’è seimper mej che esser custràtt in cà a zugher a pigugnin cun la Pulonia. Adesa po’, ca pèra chi véren dal tótt i teater, i cinema e al discotechi , a vedrìi che pian pian a turnaram a viver come prémma. Mo an fàmma menga i fureb a pensèr che tótt sia finìi , bisàgna aver ancàra dimandi atenzioun: vaccinèv e stèe luntan da quìi a rischio , lavèv spàss el man e a vedrìi che San Zemian , che una volta al s’ha salvèe da Attila, as salvarà anch dal Covid desnov.
Mè ,per adesa, am seint in forma : am sun fat la terza dose e s’agh-srà bisàgn am farò anch la quèrta perché Sandroun , la Pulonia e Sgurgheghel igh cràden in dla scieinza e sa rivaràm a la fin dla pandemia a srà merit ed chi scienzièe che , per catèr al vacino , i steven in pée anch a la not.
Sgor.: Sè ,popà, però un quelch dóbbi al m’è armès. Chi al sà cusa gh’era deinter a la fialàtta quand i m’han fat la puntura? Si m’éssen mo inietèe un cips per entrèr in dal mée zervel ?
Sand.: Stà tranquell Sgurgheghel che in dal tóo chès al cips l’avrev girèe a vód , perchè mè a g’ho di dóbbi che t’egh l’avi al zervel! Dounca Zemian , a giva ch’am seint in forma, brisa come quand a gh’iva treint’an mo abasta per guarder al futuro con rinnovata fiducia, cuma dis quìi chi san ed làttra. Vera Pulonia?
Av dev dir che , turnand a Modna , a-i-ho vest del nuvitèe come i monopatin col mutor, simbolo dal progress perchè ai mée teimp , per eseimpi, ander in monopatin bisgniva cucèregh adrée , adèsa i giren ‘na manovela e i van come del saiàtt.
I fan di spiapàss a chi pover pensionèe…Ogni tant imbàllen un quelchidun , magari sul pedonel mo , a pèra che nissun agh fàga chès.
Mè a degh ca psiven anch feren a meno di monopattini mo il businnes è businnes.
Sgor.: As dis businnes..
Sand.: Anch si deven custer poch perché a s’in càta in gir mulèe per tera come chi fossen di ruttam. D’altronde cum’àmia da dir : vést che i noster ministrador i van avanti a strichèr el stred , l’è cièra ch’is volen fer digerir un poch a la volta i mezzi alternativi agli automobil, cioè el ciclo, i monopattin e i filobus : et vedrèe che pian pian igh gla cavaran!
Ormai in machina as va sol in fila indiana , agh vól di occ da gatt per schiver i muratt per tèra , i s’han inberiaghèe col rotandi e anch in di viée i passagg per gl’ avtomobil i ein acsè strécch che stetr’an, invece che cun la caròza, am tucarà gnir a Modna cun l’apecar. Andèr da Sant’Agustein a la Maduneina, agh vól un’ora e un quert!! Per fer dal tampledi cumpagni era boun anch Sgurgheghel seinza ciamèr di tecnich….. Mo me a degh ! Invece che spànder tant milion per ciclabil e pedonabil an srev stèe mej asfalter el stredi, sistemer la segnaletica, turner a fer el righi bianchi per tera ch’in-n’es vàden piò gnanch in tangenziel, màtter del lus ai passagg pedonée e pudèr i elber chi quàcen i lampioun . V’in siv adèe che apeina fóra dal ceinter ed Modna a gh’è un’orba come quand a gh’éra l’oscuramento in teimp ed guèra ?
PULO.: Dai Sandroun , an t’agiter , t’al sèe che po’ at vin la tachicardia , cambia mo’ argomeint e chi dev capir , capéssa!!!
SAND.:A proposit, a-i-ho vést che in cèinter i han avért al diurno in piaza Mazzini. A dev dir chi han fat un bel lavor..a gh’è vlùu ‘na vintèina d’ann mo adesa , finalmeint , an g’am piò la preoccupazioun d’an rivèr menga in teimp. A-i-ho fàt dùu count e a-i-ho vest che se un pensionèe , con bassa autonomia , al va a pissèr dóo, tre volt al dè , con qual ca casta al bigliatt, bisàgna ch’al faga la dmanda per l’aumeint ed la pensioun.
Sgor.: L’è vera ch’as pèga 2 Euro, mo vliv màtter psér ander al cèsso in ascensor…
Sand.: A-i-ho anch vést che , grazie al 110 per cento , iein adrée chi giósten dimandi cà, i han infin tachèe a inscartuzèr al vècc usdèl Sant Agustein… l’era ora, finalmeint anch i palaz dal ceinter ritorneranno ai vecchi splendori… brisa come quand a gh’era al Dócca mo bisàgna ch’as cuntintàmma. D’altronde ,tra un Dócca e un sèndech, a gh’è la sóo bela difereinza!
Pulo.: Mè però a degh che, dato chi gh’ein adrée , a srév un bel lavor chi mitéssen man anch ai pordegh che , coi palaz , iein l’unor ed Modna.
Sand.:Brèva Pulonia, et n’èe détt óna giósta perchè , a nueter Zemian , as piès vàder i turesta chi giren soddisfat per la nostra zitèe. Quand a peins a tótt i canée ca g’am sàtta ai pée che, se invece ed quacèri , i essen lassèe avért, am vin al magoun perchè a ‘st’ora a psiven girer per Modna in gondola. Sa vot ch’at déga , Pulonia , me a i turnarév a squacèr….
Pulo.: Próva a descàrer col Séndech , t’al sèe che Muzareli as léva tótti el mateini cun ‘n’idea nóva , s’agh piès la proposta l’è boun ed trasformèr piaza Sant’Agustein in piaza San Mèrch col campanil e tòtt.
Sand.: Zemian , a-i-ho vest in dal giornel che, in dla classifica dla qualitèe ed la vétta , Modna l’è passèda dal trentaquattresimo al quindicesimo posto. OH!! Aiam fat un bel sèlt ! A sam infin passèe davanti ai noster cusèin ed Razz ch’l’è tótt un dir .
SGOR.: Popà , i arzan iein armès indrée anch perchè in g’l’han ancàra cavèda a cater al vaccino anticovid: peinsa che iein i unich al mand chi g’han al virus quadrèe.
Sand.: S’t’al dìi tè a gh’è da cràdregh…. Però, secand me, a Modna agh manca quèl ed moderen: una grande opera architettonica , un quèl , cum’as dis incóo , che proietti la nostra città nel mondo del futuro. A Ràzz, ad eseimpi, i g’han le opere di Calatrava. A Modna a gh’iven la mura e i l’han tireda zà , a gh’iven al caval ed Palladino e l’è andèe a finir in ‘na ceramica , a s’é armès l’oca ed fèr ca pèra chi la vojen spuster dal Raffaello al Mata , mo a sam bein luntan dalle opere chi faréven grand la nostra zitèe.
Sgor.: Beh mò per Nadel , in piaza Venti , an g’am avùu al Babbo Natale col tutù, s’an n’é un’ opera d’arte quàlla lè. Popà , perché a Modna an fani come a gh’è a Parigi e a Ramma : un bel arco di trionfo magari con sóvra la scultura dal Dócca Francesco a caval…
Sand.: Mo làssa ster al Dócca e al sóo caval , a Modna agh vol quel ch’l’arciama l’arte moderna lighèda a la tera di mutor , cum’as dis a la “Motor valley.”
Sgor.: Alora a psam dmander a Renzo Piano ch’as faga un bel monopattino gigante a mutor da màtter sovra al punt ed l’autostrèda a Modena Nord. Cs’in dit Popà ?.
Sand.: A dégh che s’et taséss et farev meno dàn ! Dounca Zemian , l’è vera che a Modna a sàm migliorèe come tenor ed la vétta mo aiam peggiorèe e anch un bel pòo per i furt in del cà. Adesa , quand et vèe a fer la spesa o un gir in dal parco , et ghèe seimper la paura che turnand indrée t’ét cat ‘na visita di leder che, s’l’at và bein , i t’han purtèe via tótt o , péz ancàra, i han cambièe la sradura e i stan in cà tua come si fóssen lor i padroun ! E t’én g’ la chèv gnanch a mandèri via….. in Italia a g’avam del légg ch‘igh dan ragioun… roba da matt……
Sgor.: Veh popà , se i leder i volen gnir a ruber a cà nostra i fan poca fadiga: an g’am gnanch la sradura e per avrir el porti a druam ancàra la marlàtta.
Sand.: Al problema l’an n’è menga la sradura , tant lor el porti i li véren tótti , l’è in dal fat che se la polizia la i ciàpa , dap dùu dè iein bèle fóra e igh tórnen adrée. Tè peinsa chi vinen fin dall’ester per gnir a ruber in Italia. I riven al lonedè , i ruben mertedè , mercurdè e giuvidè, venerdè e sabet ii pàssen in galera e a la dmanga i tornen a cà sóo coi noster sold.
Sgnora Prefetta , al sò ch’l’è arivèda da poch , mo la guèrda che quasta , per Modna , l’è ‘na prioritèe : agh vol tolleranza zero cun i leder, L’as faga mò vàder , cuma a giam nueter mudnes , che “granèda nóva la spàza bein la cà”.
Pulo.: A ghè anch la microcriminalitèe. Me a g’ho seimper paura che , un de stìi dè , Sgurgheghel , a scola , al s’imbàta in ónna ed cal beby gangh ed ragaz , ed bouna famja , disni lor, che , per rubèret al celluler o addiritura al panein , it dan del bòtt da orèb. Al dégh ai presid e ai professor: tgni i occ avért e an n’avidi paura ed denuncier ‘sti delinqueint; nueter genitor a vlam éser tranquéll quand a mandam a scola i noster fióo.
Sand.: A proposit de scóla , me a capéss che i noster fióo i deven imparer l’ingles, ch’l’è la lingua del domani ma , prémma però , igh deven insgnèr l’italian perchè la nostra bèla lengua an la sa piò nissun. Dounca Zemian, cuma a vdìi , i ann i pàssen svelt come i pumper e s’an me sbàlii , ‘st’an , al noster Séndech l’è arivèe a metèe del secondo mandato ; quand a l’avam elètt l’iva da esser per Modna : “una medicina“ da consumarsi entro maggio 2024” e la dmanda adesa la vin spontanea: “ S’él cunsumèe abasta ,fin adesa, Giancarlo per Modna ? A g’am ancara dùu ann davanti per vàder s’l’ha mantgnùu el promessi fati ai Mudnes , po’ a sram nueter zitadèin a dir la nostra. In quanto a consumeres an gh’è menga di dóbbi, l’è seimper andèe dapertótt! A l’an passèe l’è fin gnùu a cà nostra al Bosch ed Sàtta per giuvidè Grass ,vera Pulonia?
Zemian , nonostante tótt i déghen che l’economia è in grande ripresa , me a péins che i commerciant a Modna i faghen fadiga a tirèr avanti la baraca .
Dimandi i véren e po’ i sèren perché iein schizèe da la concoreinza delle multinazionali o dal commercio on line.
Sgorg.: On line , popà , on line !
Sand.: Me a capéss ch’l’è còmed telefoner e fères rivèr la roba a cà , mo vliv màtter girer per la nostra zitèe, entrèr in un bel negozi, fer dóo ciacher cun la coméssa ch’l’at dà di cunsélli e fer spesa lè. Mudnes, comperate Italiano e ai commerciant a dégh: tgnìi el vedreini in ordin, bein illuminedi, massima cortesia e possibilmeint “buteghi avérti anch a la festa” per i noster zitadein e anch per i turésta chi volen fer spesa , se mai a stée po’ a cà al lonedè come i barber! A speram acsè d’an vàder piò per Modna di cartée cun scrett “ Cessata attività’” .
Pulo.: Scolta Sandroun, è vera che la Torrefazione dal caffè Molinari l’è andeda a finir in man ai tedasch?
Sand.: Tès tès… et vedrèe che, quand a s’egh passarà davanti , invece ed sèinter cal boun aroma ed caffè , as tucarà nasèr la pózza ed crauti!
Pulo.: Ecco, agh sàm ,et t’ée imbraghèe ‘n’etra volta. T’al sèe ch’ét dev ster chelem chi t’han apeina fat la terza dose e l’antinfluenzel , a và po’ a finir che el pilloli per al cor in-t counten gninta….. Adesa avrev dir la mia:” Ragazoli cuma stev ? Me ed politica a m’ n’intand poch mo se al prossim séndech al fóssa ‘na danna an m’in despiasrev menga. Pensèe…‘na dànna séndech ed Modna…che rivoluzioun… finalment spazio alle quote rosa nei luoghi del potere. Sè perché, nonostante i déghen ca g’am la paritèe, egliein bèli storii: chi amm ig cmandén ancàra lor o almeno , nuetri a g’al lassam cràder. Ragazoli , mo iv vést Sanremo? Diiiiiiiiiooo che spetacol cl’Amadeus, tótt quall ch’al tàcca al dvèinta or!…..L’ha infin riesumèe Morandi , Ranieri e la Zanicchi: a gh’ho ancàra la speranza che ‘st’etr’an am ciama me come co-conduttrice!
Al problema lè che i an i pàssen per tótt e ‘na quelch ruga in dla ghégna e sàtta ai occ l’as tàca a vader; me a m’in sun acorta perché Sandroun am me fa piò i simitoun come quand a iera zovna, mo me al capéss… anca lò al g’ha i sóo problema. ‘Na volta am curiva adrée in di prèe adesa, per la paura ca ghe dmanda quel, an vin gnanch megh in dal campagna a fèr l’erba per i cunej.
Mo an fa gninta. Ragazoli , pinsam a la salut ch’-l’è al lavor piò important , per al rest a srà quel che Dio vol.
Sand. Pulonia, come al solit at pies màtter in piaza i lavor ed cà nostra. Dounca, a-i-ho savùu che al teater Comunel , ch’l’era teater Luciano Pavarotti , adèsa l’è dvintèe teatro Pavarotti Freni. Am sambra ‘na bouna idea perché tott e dùu i han purtèe Modna e al bel cant in dal mand. A gh’era anca me al Comunel quand in dal diciamber dal 1967 i han cantèe insàm la” Bohème”..un grand success : l’è stèe da cla sira lè che Luciano e la Mirella , dap tant sacrifézzi, i han capìi che per lor la “bohème” l’era finida.
Sgor.: Scolta popà ,farani ‘na statua anch per la Freni da màtter ed fianch a quàlla ed Pavarot?
Sand.: I la faran ed sicur, sa catàm un quelchdun ch’as la regala….
Sgor.: Adesa a tàcca mè, a tàcca mè: Mudnes, sportiv , tifos dal Modna iv vést? St’an an gh’ n’é per nissun. A sàm i piò togo e a n’al degh menga per scaramanzia…..mo mè am seint bèle in serie B.
Finalmeint i canarein i han finìi de spiguzzèr e a pèr chi sien turnèe avrir el gli-èli. Mo menga sol i canarein , iv vest l’Italia cs’l’ha fat a l’an passèe ?. Campione d’Europa in dal calcio, agli Olimpiadi 40 amdai, campioni ed pallavolo e tótt al rest ch’agh vin adrée. E Berrettini in Australia? L’è propria vera che l’Italia s’è desta, almeno in dal sport. Al mée magoun , però , l’è la Ferrari :an g’la cavàm piò a ingranèr la mèrcia giósta.
Dai mo Drake , da lassò , dà ‘na quelch drétta ai inzgner ed Maranel chi faghen in manéra ed fer turner le “rosse” ai vecchi splendori.
Sand.: Basta , basta che a descarer de sport t’et mount la testa. Bisàgna ca salutàma chi sgnor chè e ch’andama vers cà prémma ca végna zà la fumana. Mudnes , a se vdram, un salut particolor e un benvenuto al dóo sgnori apèina rivèdi a Modna : al prefett e al Questor. A salutam anch il generale nov cmandant ed l’accademia , il comandante dei Carabinieri,il comandante dei Vigili del fuoco e quello dei Vigili urbani !!
Sgor.: A proposit d’autoritèe, è vera che Monsignor Morandi , per turnèr a Modna, l’ha tintèe ed fer el schèrp al noster Vaschev Erio e
al Pepa, per punizioun, al l’ha mandèe ed Razz ?
Sand.: Mo csa dit Sgurgheghel, dveintet matt!? Iein stèe promoss tótt e dùu . Monsignor Morandi l’andrà , per mérit , Vaschev a Razz e al noster Don Erio i l’han fat Vice Presideint ed la CEI….dit bavèla??
Sgor.: Boh!! L’andrà bein acsè mo me an n’al vadd Monsignor Morandi a Razz , chi gh’han la testa quedra, lò ch’l’è tótt acsè bel rotand…..
Pulo.: Veh , Sgurgheghel , an vói menga ch’ét manch ed rispètt ai noster Vaschev , t’oia
insgnèe acsè!?!?
Sand.: Zemian , come a vdìi , egli autoritèe a Modna el vinén e el van meinter me , Sandroun e la mée famja , a sam seimper chè e av sam asvein da 150 an e a ghe sràm per eter 150 e anch de piò. Continuèe a vléres bein come i voster peder e i voster nònn perché Sandroun l’è seimper quàl: sciètt, sincer e generós come tott vueter. Adesa , av salutam daboun e come seimper a m’arcmand: Mudnes , tgniv strécch a la piopa, ch’l’è po’ cla piopa elta e sàcca pianteda in dl’umbreghel ed Modna e ch’l’as ciama Ghirlandeina!!!!
